مشروع الآيس كريم الجيلاتى 2024

 

مشروع الآيس كريم الجيلاتى 

بدون أى مقدمات هندخل فى الموضوع علطول وهو مشروع مربح جدا وشغال بإستمرار وهو مشروع الآيس كريم ، بس بشكل جديد ومبسط وهقولك على عدة أفكار ربما تكون جديدة وممكن تفيدك وتاخد منها اللى يناسبك وتشتغل عليها ، وبرده زى ما بقول كل مرة دى مجرد أفكار ويجب عليك إنك تضيف ليها فكرتك إنت عشان كل واحد وله ظروف خاصة زى المكان أو الوقت فلازم تفكر بالحاجة اللى تناسبك .

أولا ، فى مصانع بتعمل الآيس كريم لمعارضها أو المحلات اللى بتبيع فيها المنتج ، وكمان دى ممكن تبيع لأى حد بسعر جملة طبعا وفى مصانع بتبيع لأى حد وملهاش أى معارض أو محلات تبيع فيها ، هى بس بتشتغل وتعمل إنتاج عشان تبيعه للناس اللى محتاجه تشتغل وتفتح محلات تبيع فيها ، دى ممكن لو عندك إستعداد تفتح محل ممكن تتعامل مع المصانع دى .

ثانيا ، إنت لو معاك رأس مال صغير حتى يكفى شراء ماكينة آيس كريم ممكن تعمله إنت بنفسك وتتعلم طريقة عمل الآيس كريم أو تجيب حد يشتغل معاك يكون متخصص زى أى شيف سورى فى الحلويات بتلاقى ناس أكيد منهم ، وتقدر تفتح محل صغير وتعرض فيه منتجك وكده يبقى عملت مصنع ومحل فى نفس الوقت .

ثالثا ، انت ممكن تعمل الآيس كريم وتعمل عبوات مقفولة وتوزيعه على السوبر ماركت ، والبقالة العادية وخاصة المناطق الشعبية تكون عبوات متفاوتة الأسعار يعنى حاجه بجنيه وحاجه بخمسة ، عشان دى مهمة جداً لازم المنتجات دى تبقى فيها أسعار وأحجام لاختلاف أذواق الزبائن .

اقرا ايضالم أكُن أنويك حباً، ولكني قد وقعت فيكِ سهوًا

اقرا ايضاماذا لو عادَ معتذرًا؟

اقرا ايضالا تبخل بمعلومة ولا تكتنز المعرفة

اقرا ايضاالعلاقات راحة ورضا وعطاء متبادل:

ماكينات الآيس كريم 

الحقيقة معرفش أسعار الماكينات بالظبط لكن هناك ماكينات رخيصة فى مصر وهتلاقى معروض منها كتير وهتلاقى مستعمل وجديد ، مش هتفرق معاك النوع بس المهم تكون بتطلع المنتج كويس وبس ، لكن لازم يكون عندك المكان المناسب للماكينة وحفظ المنتج نفسه زى الثلاجة الكبيرة التى بتكون بالمصانع وهى غرفة محكمة الغلق أشبه بالفريزر ، ودى حاجه أساسية لأن الآيس كريم لازم يكون متماسك ، إبحث الآن عن أسعار ماكينات تصنيع الآيس كريم .

أنواع الآيس كريم 

فى ناس كتير ما تعرفش بعض أنواع الآيس كريم الكتير لكن الحقيقة هقولك على انواع كتيرة ممكن تكون عارفها أو لا زى الفانيليا ، الشيكولاته ، مانجا ، فراولة ، فستق ، جوافة ، لمون ، أناناس ، موز ، كل الأنواع دى إنت ممكن تبقى عارفها لكن ممكن مكنتش تعرف الأنواع دى ، ودى تعتبر الأغلى والأعلى زى بسكويت ، مكسرات ، شوكولا مكسرات ، توت وزبادى ، حليب مكسرات ، وفى أنواع كتير أنا بس اللى إفتكرته قولته ، لكن تخيل عندك محل صغير فى منطقة شعبية وعندك الأنواع دى هيبقى إيه وضعك .

أعتقد أنه مشروع كويس وممكن تفكر فيه كويس لكن لازم تعمل دراسة جدوى ، وتعرف كل كبيرة وصغيرة والأسعار تحاول توصل لأقل سعر ممكن فى بدايتك ، أنا لما فكرت الحقيقة أعمله قبل كده مكنتش أملك أى فلوس لكن كنت بدرس المشروع كويس وحاولت اوصل لشيف كويس يعملى الآيس كريم باليومية عشان يكون منتج كويس وحاولت أوصل لمصنع برده أشترى منه الأنواع بالجملة وفعلا كلمته وإتفقت معاه بس الحقيقة نسيت سعر الجالون كام .

انا كنت هفتح محل يكون زى استراحة ممكن تطلب الآيس كريم وتقعد وتأكل الآيس كريم وبعدين تمشى ، وكنت عايز أعمل اللى هو مش آيس كريم وبس لا كنت عايز أعمل جمبه المشروبات والعصائر الفريش السريعة ، بجانب مشروبات ساخنة سريعة يعنى ممكن تبقى معدى إنت وحبيبتك أو صديقك وتدخل تريح شوية وتشرب اللى عايزه ، وكنت بفكر فى كل تفصيلة ده بكام وده عامل إيه وهنكسب إزاى وهنقدم الخدمة إزاى ، وعدت عليا فترة الحقيقة لغاية ما نسيت المشروع خالص لعدم وجود المادة .

من الناحية العملية المشروع كويس وممكن انت تغير حاجات لو فكرتى مش مناسبة ليك ، لأن العلم والعالم بيتطور فأنت لازم تتطور وتحاول تحط فكرتك لو إنت مهتم بالمشروع ده ، وحتى لو هتنفذ أى خطوة منه يا تبدأ بالتصنيع أو الشراء الجاهز وتبيع فى محل صغير أو العبوات لسوبر ماركت ، المهم أن كل ده عايز تكون بتشتغل بشكل سليم وقانونى لو مهتم فعلا ومعاك المادة اللى تبدا بيها ، عشان تبقى قانونى عايز تعمل شهادة صحية وسجل تجارى وتعمل علامة تجارية باسمك وكده تبقى قانونى وتقدر تنزل شغلك فى أى مكان وعند أى حد ، لأنك مش هتعرف تبيع شغلك لو إنت اللى هتصنعه للسوبر ماركت لازم تبقى قانونى لأن ساعات بيكون فيه تفتيش ولو لاقدر الله وصلوا ليك تبقى قضية وغرامة ومضايقات .

كل اللى عليك دراسة جيدة من حيث اسعار المواد الخام المطلوبة واسعار الماكينة ودراسة المكان والتسويق ، ثم بعد ذلك تبدأ العمل بس ماتقفش على حد معين لازم وانت شغال تكون متطور وتحاول تعمل الفكرة الجديدة ، وابحث دايما وشوف المنافسين لك عشان تعرف هل انت بتشتغل صح او لا .